കേരള ഔദ്യോഗിക ഭാഷ (നിയമനിര്‍മ്മാണ) കമ്മിഷന്‍

ആമുഖം

    ഭാരതത്തിന്റെ വ്യാവസായികവും സാംസ്ക്കാരികവും ശാസ്ത്രീയവുമായ പുരോഗതിക്കും പൊതുസേവനങ്ങള്‍ സംബന്ധിച്ച് ഹിന്ദി സംസാരിക്കാത്ത പ്രദേശങ്ങളിലുള്ള ആളുകളുടെ ന്യായമായ അവകാശങ്ങള്‍ക്കും താല്‍പര്യങ്ങള്‍ക്കും അര്‍ഹമായ പരിഗണന ഉണ്ടായിരിക്കണമെന്ന ലക്ഷ്യത്തോടെ ഔദ്യോഗിക ഭാഷ സംബന്ധിച്ച് ബഹുമാനപ്പെട്ട ഭാരത രാഷ്ട്രപതിക്ക് ശിപാര്‍ശ നല്‍കുന്നതിനായി രാഷ്ട്രപതി ഉത്തരവ് മുഖേന ഒരു കമ്മിഷന്‍ രൂപീകരിക്കണമെന്ന, ഭാരതത്തിന്റെ ഭരണഘടനയിലെ 344-ാം അനുച്ഛേദത്തിലെ (1) ഉം (3) ഉം ഖണ്ഡങ്ങളിലെ നിര്‍ദ്ദേശങ്ങളുടെ അടിസ്ഥാനത്തില്‍ രൂപീകരിച്ച കമ്മിഷന്റെയും, പ്രസ്തുത അനുച്ഛേദത്തിലെ (4)-ാം ഖണ്ഡപ്രകാരം രൂപീകരിച്ച പാര്‍ലമെന്ററി കമ്മിറ്റിയുടെ ശിപാര്‍ശയുടെയും അടിസ്ഥാനത്തിലാണ് കേന്ദ്ര ഔദ്യോഗിക ഭാഷ (നിയമനിര്‍മ്മാണ) കമ്മിഷന്‍ 1961-ല്‍ രൂപീകരിക്കപ്പെട്ടത്.  ഇതിനെ തുടര്‍ന്ന് കേന്ദ്ര നിയമങ്ങള്‍ പരിഭാഷപ്പെടുത്തി പ്രസിദ്ധപ്പെടുത്തുന്നത് കേന്ദ്ര നിയമ മന്ത്രാലയത്തിന്റെ ചുമതലയിലായിരുന്നു.

      എന്നാല്‍, അതിനുശേഷം കേന്ദ്ര നിയമങ്ങള്‍ പ്രാദേശിക ഭാഷയിലേക്ക് പരിഭാഷപ്പെടുത്തി അച്ചടിച്ച് പ്രസിദ്ധപ്പെടുത്തുന്ന എല്ലാ ചെലവുകളും കേന്ദ്ര സര്‍ക്കാര്‍ വഹിക്കാമെന്ന് തീരുമാനിച്ചതിന്റെ അടിസ്ഥാനത്തില്‍ സംസ്ഥാനങ്ങളില്‍ ഔദ്യോഗിക ഭാഷ (നിയമനിര്‍മ്മാണ) കമ്മിഷന്‍ രൂപീകരിക്കുവാന്‍ തീരുമാനിക്കുകയും 14-06-1968-ലെ സ.ഉ.(കൈയ്യെഴുത്ത്) നമ്പര്‍ 42/68/നിയമം എന്ന ഉത്തരവ് പ്രകാരം സംസ്ഥാനത്ത് കേരള ഔദ്യോഗിക ഭാഷ (നിയമനിര്‍മ്മാണ) കമ്മിഷന്‍ രൂപീകരിക്കുകയും ചെയ്തു.

       സംസ്ഥാനത്ത് പ്രാബല്യത്തിലിരിക്കുന്ന കേന്ദ്രനിയമങ്ങളുടെ മലയാള പരിഭാഷ തയ്യാറാക്കി ആധികാരിക പാഠമായി പ്രസിദ്ധീകരിക്കുകയും അതുവഴി നിയമങ്ങള്‍ സാധാരണക്കാര്‍ക്ക് പ്രാപ്യമാക്കുകയും ചെയ്യുന്നതോടൊപ്പം, ഭരണഭാഷ പ്രാദേശിക ഭാഷയിലായിരിക്കണം എന്ന കേന്ദ്ര-സംസ്ഥാന സര്‍ക്കാരുകളുടെ നയം നടപ്പിലാക്കുന്നത് ത്വരിതപ്പെടുത്തുന്ന കര്‍ത്തവ്യവും കൂടിയാണ് കേന്ദ്രനിയമങ്ങളുടെ മലയാള പരിഭാഷ ആധികാരിക പാഠങ്ങളായി തയ്യാറാക്കുന്നതിലൂടെ കേരള ഔദ്യോഗിക ഭാഷ (നിയമനിര്‍മ്മാണ) കമ്മിഷന്‍ നിര്‍വ്വഹിക്കുന്നത്.

     കേന്ദ്രസര്‍ക്കാര്‍ നിശ്ചയിക്കുന്ന 'മുന്‍ഗണനാപട്ടികയുടെ' അടിസ്ഥാനത്തിലാണ് കേന്ദ്ര ആക്റ്റുകളുടെ മലയാള പരിഭാഷ തയ്യാറാക്കി കേന്ദ്രസര്‍ക്കാരിന് സമര്‍പ്പിക്കുന്നത്.  കേന്ദ്ര ആക്റ്റുകളുടെ മലയാള പരിഭാഷയുടെ പ്രസിദ്ധീകരണവുമായി ബന്ധപ്പെട്ട എല്ലാ ചെലവുകളും കേന്ദ്ര സര്‍ക്കാരാണ് വഹിക്കുന്നത്.  തിരുവനന്തപുരം ആസ്ഥാനമായുള്ള കമ്മിഷന്‍, കേരള സര്‍ക്കാരിന്റെ നിയമ വകുപ്പിന്റെ കീഴിലാണ് പ്രവര്‍ത്തിക്കുന്നത്.

      ഒരു മുഴുവന്‍ സമയ ചെയര്‍പേഴ്സണും, രണ്ട് മുഴുവന്‍ സമയ അംഗങ്ങളും ഉള്‍പ്പെടുന്നതാണ് കമ്മിഷന്‍.  കേരള സര്‍ക്കാര്‍, സെക്രട്ടറിയറ്റ് നിയമ വകുപ്പിലെ സ്പെഷ്യല്‍ സെക്രട്ടറി / സീനിയര്‍ അഡീഷണല്‍ സെക്രട്ടറിയുടെ പദവി വഹിക്കുന്നവരാണ് ചെയര്‍പേഴ്സനായി നിയമിക്കപ്പെടുന്നത്.  രണ്ട് മുഴുവന്‍ സമയ അംഗങ്ങള്‍, നിയമ വകുപ്പിലെ അഡീഷണല്‍ സെക്രട്ടറിമാരാണ്.  നിയമ വകുപ്പിലെ ഒരു ജോയിന്റ് സെക്രട്ടറിയാണ് കമ്മിഷന്റെ സെക്രട്ടറിയായി നിയമിക്കപ്പെടുന്നത്.  കമ്മിഷന്റെ സുഗമമായ പ്രവര്‍ത്തനത്തിന് വേണ്ടി ഉദ്യോഗസ്ഥരെ താഴെപ്പറയും വിധത്തില്‍ മൂന്നായി തിരിച്ചിരിക്കുന്നു.

      i. സാങ്കേതിക വിഭാഗം:- കേന്ദ്ര ആക്റ്റുകളുടെ മലയാളം പരിഭാഷയാണ് ഈ വിഭാഗത്തില്‍ കൈകാര്യം ചെയ്യുന്നത്.

     ii. വില്‍പ്പന വിഭാഗം    :- കേന്ദ്ര നിയമങ്ങളുടെ ആധികാരിക പാഠങ്ങളുടെ വില്‍പ്പനയാണ് ഈ വിഭാഗത്തില്‍ കൈകാര്യം ചെയ്യുന്നത്.

    iii. ഭരണ വിഭാഗം        :- കമ്മിഷന്റെ ഭരണപരമായ വിഷയങ്ങളാണ് ഈ വിഭാഗത്തില്‍ കൈകാര്യം ചെയ്യുന്നത്.